ಇಪ್ಪತ್ತನೇ ಶತಮಾನದ ಮೊದಲ ದಶಕದಲ್ಲಿ ಹಿಂದೂ ಸಮಾಜದ ಹೆಚ್ಚಿನ ಸಕ್ರಿಯತೆಗಾಗಿ ಎಲ್ಲ ಕ್ಷೇತ್ರಗಳಲ್ಲಿಯೂ ಸ್ವದೇಶೀ ಚಿಂತನೆಯ ಅನುವರ್ತನೆಗಾಗಿ ಅಸಾಮಾನ್ಯ ಸಮರ್ಪಣಭಾವದಿಂದ ಶ್ರಮಿಸಿ ಯಶಃಕಾಯರಾದವರು ಸ್ವಾಮಿ ವಿವೇಕಾನಂದರ ಕರಕಮಲಸಂಜಾತರಾದ ಸೋದರಿ ನಿವೇದಿತಾ. ಅತ್ಯಂತ ಪ್ರತಿಕೂಲ ರಾಜಕೀಯ-ಸಾಮಾಜಿಕ ಸನ್ನಿವೇಶದಲ್ಲಿ ಸಮಾಜಜಾಗೃತಿಗಾಗಿ ಒಬ್ಬ ಸಾಧಕರು ಪರಿಶ್ರಮಿಸಿ, ದಂತಕಥೆಯೆನಿಸುವಂತೆ ತಮ್ಮ ಪದಚಿಹ್ನೆಗಳನ್ನು ಉಳಿಸಿಹೋದ ಇನ್ನೊಂದು ಉದಾಹರಣೆ ದುರ್ಲಭ. ಈ ಅಗಾಧ ಸಾಧನೆಯನ್ನು ಆಕೆ ಹದಿನಾಲ್ಕು ವರ್ಷಗಳಷ್ಟು ಅಲ್ಪಕಾಲದಲ್ಲಿ ಮಾಡಿದುದಂತೂ ವಿಸ್ಮಯಾವಹ. ಸ್ವಾತಂತ್ರ್ಯ ಸಂಗ್ರಾಮದ ಮುನ್ನಡೆಗಾಗಿಯೂ ವಿವಿಧಮುಖ ಸಾಂಸ್ಕೃತಿಕ ಉಜ್ಜೀವನಕ್ಕಾಗಿಯೂ ಸೋದರಿ ನಿವೇದಿತಾರಿಂದ ಸಂದ ಕೊಡುಗೆಯ ಸ್ಮರಣೆ ಚಿರಕಾಲ ಸ್ಪೂರ್ತಿಸ್ಥಾನವಾಗಿ ಉಳಿಯುತ್ತದೆ. ಆ ರೋಮಾಂಚಕ ಗಾಥೆಯ ಪ್ರಮುಖ ಅಂಶಗಳನ್ನು ಈಗಿನ ಪೀಳಿಗೆಗೆ ಪರಿಚಯಿಸುವುದು ಈ ಕೃತಿ ‘ಅಗ್ನಿಪಥಿಕೆ ನಿವೇದಿತಾ’.