ಇಪ್ಪತ್ತನೆಯ ಶತಮಾನದ ಶ್ರೇಷ್ಠ ಸಂಗೀತಜ್ಞರಲ್ಲಿ ಗಣ್ಯರಾಗಿದ್ದವರು ರಾಳ್ಳಪಲ್ಲಿ ಅನಂತಕೃಷ್ಣಶರ್ಮರು. ಶ್ರೇಷ್ಠ ಗಾಯಕರೂ ಆಸ್ಥಾನ ವಿದ್ವಾಂಸರೂ ಆಗಿದ್ದ ಬಿಡಾರಂ ಕೃಷ್ಣಪ್ಪನವರಲ್ಲಿ ಸಂಗೀತಾಭ್ಯಾಸ ಮಾಡಿದ್ದ ಶರ್ಮರು ಸಂಗೀತಶಾಸ್ತ್ರದಲ್ಲೂ ಪ್ರಯೋಗದಲ್ಲೂ ಅಸಾಧಾರಣ ಪರಿಣತಿಯನ್ನು ಪಡೆದಿದ್ದರು; ಹಲವು ಶಿಷ್ಯರನ್ನೂ ಉನ್ನತಮಟ್ಟದ ಸಂಗೀತಗಾರರನ್ನಾಗಿ ರೂಪಿಸಿದರು. ಸಂಗೀತಶಾಸ್ತ್ರ ವನ್ನೂ ಸಂಗೀತಗಾರರನ್ನೂ ಕುರಿತಂತೆ ಅವರು ಕರ್ನಾಟಕ-ಆಂಧ್ರ ಪ್ರದೇಶಗಳಲ್ಲಿ ಹಲವಾರು ಉಪನ್ಯಾಸಗಳನ್ನೂ ಮಾಡಿದ್ದರು; ಕನ್ನಡ-ತೆಲುಗುಗಳಲ್ಲಿ ಹಲವಾರು ಲೇಖನಗಳನ್ನೂ ಬರೆದಿದ್ದರು. ಶರ್ಮರ ಆ ಲೇಖನ-ಭಾಷಣಗಳ ಸಂಕಲನ ‘ಗಾನಕಲೆ.’